التوب السودانى :

التوب السودانى :
اختلف الباحثين فى اصل ومصدر التوب السودانى ففى القديم كانو حبوباتنا بلبسو القرقاب من تحت وومن فوق قطعة قماش مابين التوب والطرحة ثم اتى ما يسمى بالطرقى وهو توب ابيض يصبغ بالنيلة التى تستخرج من بعض النباتات ويصبح اسود اللون ... لذا جاءت مقولة المصريين"جاتك نيلة" كناية عن سواد حظك..
ثم ظهرت الثياب التى تنسج يدويا كالفردة والقنجة وتوب الكمالى الذى اشتهر فى شندى وكان يلبسه الرجال ايضا فيتلفحون به على شكل الحرف اكس..
و مع الحكم التركي بدات الاقمشة ترد من مصر توب الزراق بلونيه الاسود والظهري الباهت الذي قال فيه اسماعين ود حد الزين: الزراق فوقا تقول حرير إنتي ريحتك دمور فرير ولا بت السودان أصيل القمر بوبا عليك تقيل كمان ان هناك ما يسمى بى توب البنغالى كنابة عن مصدره من بلاد البنغال وتياب الحد التى تقطع من الدمور او الدمورية وزنى عشرة ونساءنا يحدون باللون الابيض عكس البلاد الاخرى التى تستخدم اللون الاسود للحزن وهذا قد يعزى لعوامل الطقس والمناخ لدينا حيث اللون الابيض يعمل على تخفيف حدة الحر ..
ثم دخل الهنود في امدرمان وغيرها ادخلوا الساري ومشتقاته ثم السويسريين في التوتال ثم تشعبت الموارد والمصادر وتعولم التوب وتفرعت انواعه واسماءه قديم وقديم مستحدث وجديد و اسامى التياب لا تخلو من طرافة ويتم اطلاقها من التجار انفسهم لمعرفتهم بنفسية النساء وولعهن بالجديد ازهرى فى المطار وابوقجيجة والمضغوط ورسالة لندن والجاكار وواحد اسمو البن مشتت وعين الديك وتوب الجارات والطير الخدارى والخرتوم بالليل وسكر سكر والنار ولعت وعودة نميرى والانتفاضة و توب الحريقة أو النجدة ذلك الثوب الذي اشتهر في نهاية الستينات وبداية السبعينات ثوب ذو لون أحمر حذاب كنت تراهو في حفلات الأعراس في الخرطوم منور الظلمة وهناك توب السرتى اب ارضية الذى يستخدم فى مراسم الجرتق ويلبسه العريس فى حين ان العروس تلبس توب الفركة و ظهر ايضا ما يسمى بتوب الربط وهو يقل عن التوب الكامل بمتر او يزيد وتتشعب انواع التياب وقد تختلف من منطقة الى اخرى فعندنا فى جنوب السودان عند قبيلة الدينكا توب يسمى اللاوى وهو يربط فى اعلى الكتف دون الحوجة الى تغطية الراس وفى مناطق الشرق توب اشبه بالسارى الهندى وعند الحلفاويين والنوبة ما يسمى بالجرجار وهو اقرب للفستان منه للتوب ولونه اسود غالبا(الجرجار اسال من الشرح في الحتة دي ربيع) ..

وقد تغنى كثير من الفنانين بجمال التوب السودانى وتفننو فى وصفه

المنكير مولع ختري ..
وحارق قلبي .. التوب الظهري ..
***
شفتا التوب وما لاقانى اجمل منو ..
سيد التوب يكون كيفنو.. ( ابوعركى )
***
شوف عينى الحبيب بى حشمة لابس التوب...
والتوب زاد جمالك زينة يالمحبوب ( اللحو )
***

كما غنى الرائع ابراهيم موسى ابا
اعز التوب وكت انشال واتفرا
***

كما غنى عبدالله الكردفانى
الكرب السادة جابونى ليكا نقادا
***
وتفر جنحيهها زي توبه
***